^{އދ.ހަންޏާމީދޫއަކީ އދ. އަތޮޅުގެ އެންމެ އުތުރަށް، އަތޮޅުގެ އިރުމަތީ ބިތުގައި، އިރުން ހުޅަނގަށް ދެމިފައި އޮންނަ ރަށެކެވެ. ރަށުގެ ދިގުމިނަކީ 1060 މީޓަރެވެ. އަދި ރަށުގެ އެންމެ ފުޅާ ހިސާބުގައި ހުންނަނީ 232 މީޓަރެވެ. މިރަށަކީ ކުޑަކުޑަ ފަޅެއް އެކުލެވިގެންވާ ގާމަތީ ރަށެކެވެ.}

 ^{މިރަށުގެ ހުޅަނގުކޮޅުގައި ހުރިހާ މޫސުމެއްގައިވެސް ރީތި ދޮންވެލި ތުނޑިއެއް އޮވެއެވެ. މިރަށަށް ޒިޔާރަތްކުރާ ފަތުރުވެރިން ބޭނުންކުރުމަށް، މި ތުނޑިން ބައެއް އޮންނަނީ ގެސްޓް ހައުސް ވިޔަފާރިކުރާ ފަރާތްތަކަށް އަންނަ ޓުއަރިސްޓުންނަށް ޚާއްސަ ކުރެވިފައެވެ. ލަފާފުރުމުގައި ބޭނުންކުރުމަށް އުތުރުފަރާތުގައި 440 ފޫޓު ދިގު 148 ފޫޓު ފުޅާ ބަނދަރެއް 2003 ވަނަ އަހަރުގައި ހެދިފައިވެއެވެ. އަދި 474 ފޫޓު ދިގު 235 ފޫޓު ފުޅާ ބަނދަރެއް 2003 ވަނަ އަހަރު ދެކުނުފަރާތުގައިވެސް ހެދިފައިވެއެވެ.}

     ^{ހަންޏާމީދޫ އަކީ ފަތުރުވެރިކަމަށް ބަރޯސާވެފައިވާ ރަށެކެވެ. ހަންޏާމީދޫގެ ވަރަށް ގިނަ ޢަދަދެއްގެ ރައްޔިތުން ރިސޯޓުތަކުގައި ވަޒީފާ އަދާކުރަމުންދާއިރު، ޓުއަރިސްޓުން ބޭތިއްބުމަށް ހެދިފައިވާ 11 ގެސްޓު ހައުސްގައި 106 އަށްވުރެ މަދުނޫން ޢަދަދަކަށް އެނދު މިރަށުގައި ހުރެއެވެ. އަދި 4 ކެފޭއާއި ރީޓެއިލް ވިޔަފާރިކުރާ 5 ފިހާރައާއި 3 ޓުއަރިސްޓް ޝޮޕް ހަންޏާމީދޫގައި ހިންގަމުން ދެއެވެ. އާމްދަނީ ލިބޭފަދަ މަސައްކަތްތަކެއް ފުޅާ ދާއިރާއެއްގައި ނުކުރި ނަމަވެސް، ފަރުމަސްވެރިކަމާއި، ދަނޑުވެރިކަން ކުރުމާއި ފަންގި ވިނުމަކީ ރަށުގައި ކޮންމެވެސް ވަރަކަށް ކުރެވެމުން އަންނަ މަސައްކަތްތަކެކެވެ.}  

      ^{ސަރުކާރުން ހަންޏާމީދޫއަށް ދީފައިވާ ކޯޑަކީ އައި އެކެއް  (I-1) އެވެ. މިރަށާ އެންމެ ކައިރީގައި މީހުން ދިރިއުޅޭ ރަށަކަށް އޮންނަނީ އދ. އޮމަދޫ އެވެ. މިއަތޮޅުގެ ވެރިކަންކުރާ ރަށް، މަހިބަދޫ އާއި ހަންޏާމީދޫއާ ދޭތެރޭ ހުންނަނީ 6 ކިލޯމީޓަރެވެ. އަދި މާލެއާއި ހަންޏާމީދޫއާ ދެމެދުގައި 73 ކިލޯމީޓަރު ހުރެއެވެ.}